Titoriais de tucho

Despóis de moito tempo sen colgar nada, déixovos un novo video e exercicio.

Facendo o “curso” completo de Qcad o ano pasado, decateime de que a moitos de vós facíasevos difícil seguir os videos porque deixara sen traballar suficientemente algúns conceptos básicos e, ao ser os videos longos, perdedes o fío da explicación. Para tentar solventar isto, empezo esta serie de “previos” ao Qcad básico, mellor que avanzar máis no programa.

O primeiro exercicio que tedes que facer é contar as circunferencias brancas que hai neste documento, empregando para iso as ferramentas de zoom e moverse no papel que se explican neste exemplo.

Espero que isto facilite as cousas, se non é así facédemo saber!

EDICIÓN: O video quedara cun volume moi baixo, agora está mellor.

EXAME SORPRESA: Tes que poñerlle as cotas (si, iso, as medidas) a todos os debuxos de todos os exercicios que tes feito até o momento. Tes 20 minutos para facelo.
Acabas de levar un susto? Mmm… imos deixar pasar o deste exame, pero imos ver o exemplo 9 e despois disme se segues pensando que era tan imposible facelo en tan pouco tempo.
Fai logo o exercicio 9.1

É importante observar que, para que o sistema de acotación de Qcad funcione correctamente, debemos sempre debuxar en dimensións reais, sexan estas milímetros, metros ou quilómetros. Se despois queremos imprimir o que temos feito, será no menú da impresora onde se escale convenientemente.

Lembra que, unha vez máis, o Qcad só nos aforra tempo automatizándonos certos labores rutinarios e ofrecéndonos ferramentas de axuda, pero ninguén te libra de aprenderte a teoría de debuxo!

Parácheste algunha vez a pensar en canto valería a informática se non existise cortar-pegar?
Evidentemente, Qcad tamén ten que ter as súas funcións de cortar-copiar-pegar, que tamén chamamos “mover”.

Observa as peculiaridades deste comando en Qcad no exemplo 8, e logo abre os ficheiros 8.1, 8.2, 8.3 e 8.4 para facer eses exercicios.
Lembra que podes aforrar moito tempo empregando os atallos de teclado para cortar (ctrl+x), copiar (ctrl+c) e pegar (ctrl+v).

Lembras aínda aqueles tempos cando tiñas que facer as vistas dunha peza?
Lembras como había que encaixar o perfil e a planta co alzado, trazar as liñas auxiliares, facer paralelas coa escuadra e cartabón, ter en conta as proporcións…
Pois non o esquezas! vaiche facer falla se queres facer este exercicio, pero… olla o traballo que imos aforrar no exemplo 7.
Abre o ficheiro correspondente ao exercicio 7.1 e fai nel as vistas que che indique o teu profesor.

Vale, vale… imos aprender a cambiarlle a cor ás liñas! (Aínda non te preguntaras como se fai?)
E si… tamén lle poderás poñer o teu nome enriba aos teus marabillosos debuxos.
Observa o exemplo 6 para ver como se fai todo isto.

Despois de ver o exemplo, abre un documento novo e debuxa nel catro figuras diferentes (p.ex. unha elipse, un rectángulo, unha estrela e un polígono) usando para cada unha un tipo e ancho de liña diferente. Ponlle enriba o nome a cada figura.
Cres que falta algún texto ou que hai que cambiar algunha liña nos exercicios que tes feitos? Faino se é así…

Agora vas dar un paso máis no teu dominio da unión de circunferencias empregando a nova e potente ferramenta “redondear”.
Observa o exemplo 5 e verás como se utiliza esta ferramenta para crear formas curvadas. Repara en que podemos combinar os dous métodos de unión de circunferencias.

Abre os arquivos correspondentes aos exercicios 5.1, 5.2 e 5.3, es capaz de crear as figuras que se che propoñen?
Serías capaz de crear algunha nova figura empregando os dous métodos de unir circunferencias?

Neste exercicio, vas aprender a unir circunferencias para crear figuras máis complexas.
Para iso imos empregar tanxentes (seguro que xa nin tes que ollar para a imaxe de abaixo para saber o que son…)

Observa o exemplo 4 para ver como é o proceso e logo abre os arquivos correspondentes para facer os exercicios 4.1, 4.2 e 4.3, nos que tes que copiar unha figura no espazo que se che dá.
É importante que te fixes no comando partir e nas opcións de forzado que se empregan para facer estes exercicios, valas voltar usar unhas cantas veces…

Imos repasar os xeitos que existen de debuxar circunferencias, para iso observa o exemplo 3 e logo tenta repetir o exercicio, facendo as circunferencias cos seguintes datos. (Lembra que, segundo os datos que se che dean en cada apartado, terás que empregar unha ferramenta distinta do menú “círculos”)

a) Con centro no pto (60,80) e que pase polo pto (80,80)
b) Con centro no pto (120,80) e radio 20
c) Que pase polos ptos (90,50); (100,50) e (100,40)
d) Un círculo concéntrico aos feitos nos dous primeiros apartados a distancia 10.
e) Un círculo que pase polos ptos opostos (10, 40) e (170,40)
f) Un arco con tres ptos na posición que ti queiras

Atréveste a facer ti só/soa o debuxo da imaxe? Téntao!

Nesta unidade vas aprender un pouco a traballar con rectas. Para iso imos facer un taboleiro para un xogo, o Bagh-Chal.

Descarga e observa o exemplo 2 para ver como se pode facer, logo debúxao e entra nesta páxina para investigar que é e como se xoga.

Viches que fácil é debuxar rectas en Qcad? atréveste a intentalo con estoutro taboleiro?

Imos empezar polo debuxo máis sinxelo de todos, o punto. Qcad traballa situando puntos nunhas coordenadas cartesianas (isto xa sabes o que é porque o estudaches en matemáticas, verdade?). Se dominas este sistema verás como che é doado crear calquera debuxo.

Descarga e observa o exemplo 1 que che explica os aspectos básicos do programa e mais como debuxar uns puntos nunhas coordenadas determinadas. Logo fai ti un documento cos seguintes puntos marcados: (30,50); (-30,50); (-30,-50); (30,-50) e gárdao no cartafol correspondente.

Agardo comentarios…