Titoriais de tucho

Neste exercicio vas aprender a facer figuras baseadas nos rectángulos, para iso descarga e abre o exemplo 6.

Cando remates, abre un documento novo (pos o teu nome exercicio6) e reproduce do xeito máis aproximado as cinco figuras da imaxe, facendo caso tamén das súas posicións.

Observa que algúns dos rectángulos son cadrados exactos, e ten en conta que no vídeo poden non parecelo dependendo da resolución da pantalla. Emprega os manexadores de redondeo para conseguir as figuras de abaixo.

Se queres profundar neste tema ou che xorden dúbidas, podes consultar o apartado “Rectángulos” do titorial de formas.

Vale, vale… imos aprender a cambiarlle a cor ás liñas! (Aínda non te preguntaras como se fai?)
E si… tamén lle poderás poñer o teu nome enriba aos teus marabillosos debuxos.
Observa o exemplo 6 para ver como se fai todo isto.

Despois de ver o exemplo, abre un documento novo e debuxa nel catro figuras diferentes (p.ex. unha elipse, un rectángulo, unha estrela e un polígono) usando para cada unha un tipo e ancho de liña diferente. Ponlle enriba o nome a cada figura.
Cres que falta algún texto ou que hai que cambiar algunha liña nos exercicios que tes feitos? Faino se é así…

Agora vas dar un paso máis no teu dominio da unión de circunferencias empregando a nova e potente ferramenta “redondear”.
Observa o exemplo 5 e verás como se utiliza esta ferramenta para crear formas curvadas. Repara en que podemos combinar os dous métodos de unión de circunferencias.

Abre os arquivos correspondentes aos exercicios 5.1, 5.2 e 5.3, es capaz de crear as figuras que se che propoñen?
Serías capaz de crear algunha nova figura empregando os dous métodos de unir circunferencias?

Neste exercicio, vas aprender a unir circunferencias para crear figuras máis complexas.
Para iso imos empregar tanxentes (seguro que xa nin tes que ollar para a imaxe de abaixo para saber o que son…)

Observa o exemplo 4 para ver como é o proceso e logo abre os arquivos correspondentes para facer os exercicios 4.1, 4.2 e 4.3, nos que tes que copiar unha figura no espazo que se che dá.
É importante que te fixes no comando partir e nas opcións de forzado que se empregan para facer estes exercicios, valas voltar usar unhas cantas veces…

Descarga o exemplo 5 e mírao con atención.
Descarga e abre tamén o exercicio 5, nel tes que practicar coas ferramentas para traballar coa cor que se che ensina no vídeo.

É importante que ti mesmo/a xogues cos distintos xeitos de crear unha cor para atopar as que máis che gusten e que empregues as ferramentas “contagotas” e “pegar estilo” para avanzar máis rápido.
A ver se tes mellor ollo para as cores ca min!

Aí vai un complicado! Neste exercicio debes abrir un documento novo, titúlao ”o teunome exercicio4”.
Aínda que o Inkscape non está pensado para iso, vas aprender a facer figuras en perspectiva isométrica… lémbraste do que é, non si?

Observa o exemplo 4 e fíxate moi ben nos pasos, convén que vaias parando o vídeo en cada un deles e facendo aos poucos o exercicio para non perderte. Lembra tamén que o valor que empregamos ao “estirar” a figura para que encaixen as caras é do 15,5%.

Os que xa teñades a versión 0.46 de Inkscape podedes probar coa nova ferramenta de creación de figuras en perspectiva, xa veredes o tempo que vos aforra e as posibilidades que vos dá!

Imos repasar os xeitos que existen de debuxar circunferencias, para iso observa o exemplo 3 e logo tenta repetir o exercicio, facendo as circunferencias cos seguintes datos. (Lembra que, segundo os datos que se che dean en cada apartado, terás que empregar unha ferramenta distinta do menú “círculos”)

a) Con centro no pto (60,80) e que pase polo pto (80,80)
b) Con centro no pto (120,80) e radio 20
c) Que pase polos ptos (90,50); (100,50) e (100,40)
d) Un círculo concéntrico aos feitos nos dous primeiros apartados a distancia 10.
e) Un círculo que pase polos ptos opostos (10, 40) e (170,40)
f) Un arco con tres ptos na posición que ti queiras

Atréveste a facer ti só/soa o debuxo da imaxe? Téntao!

Baixa e abre o exercicio 3.
Atréveste a reconstruír as pezas do cubo soma a partir de cubos?

Duplica o cubo que se che dá todas as veces que che faga falla e téntao!
Lembra que terás que usar os comandos de mover arriba e abaixo na orde da pila que se che explicaban no titorial básico.
Observa o exemplo 3 se queres unha axuda.

Descarga e abre o exercicio 2.
Verás varios debuxos de Jock (todos de dimensións diferentes) e un chapeu.

Volta a botarlle un ollo ao titorial básico e fíxate, sobre todo, en como se fai para duplicar un obxecto (o atallo de teclado é moi útil) e para escalalo, rotalo ou inclinalo empregando os manexadores. Usando estes comandos terás que facer tantos chapeus como sexan precisos e logo modificalos e colocárllelos axeitadamente a cada debuxo de Jock.

Mira que lle asenten ben!

Podes baixar o exemplo 2 para ver como se fai.

Debuxo de Jock de nicubunu e chapeu de kattekrab.

Para empezar esta unidade tes que descargar o exercicio 1. Cando o teñas descargado, ábreo e  axudarache a ordenar un pouco o barullo de figuras que están no círculo.

Empregando as ferramentas de zoom e selección que se explican neste titorial básico, móvete polo debuxo para localizar as figuras e arrastralas ao recadro correspondente.
Presta moita atención e revisa ben, algúns debuxos están moi agochados! Cando teñas atopado 10 vacas, 10 poliños con gafas, 8 cans magos e 15 elefantes acabarás o exercicio. Podes descargar e observar o exemplo 1 para ver como se fai.

Vaca de mairin , cans, elefante e poliños de Gerald_G, grazas tamén aos autores/as dos outros debuxos.